大吐苦水

國慶寫嘅嗰篇文,最後話會更新最近狀態,冇諗到一拖就一個星期。

講到最近,真係各種當黑、運滯,成個人都神不守舍咁,又有勁多負面情緒。

不過都係嗰句啦,過去咗嘅嘢就算數啦。

想寫落嚟,只不過係因為覺得寫落嚟就係放低落嚟。


如果要講嘅話,可能要從中秋之前開始講。

自從確診之後,一直都有好注意身體,同埋保持鍛煉。中秋之前因為要幫手準備,少不了搬搬抬抬。其實又唔係好多嘢或者好重,可能因為一下子冇注意吧,反正就覺得有小小唔舒服啦。

不過嗰種程度對我嚟講真係濕濕碎。咁就中秋自己好好休養下啦。

中秋因為要提前準備校招,就開始加班喇。唔知係老闆賞識抑或係另外兩位大佬唔得閑,反正有任務啦
,其實都幾開心嘅。

過完個中秋,翻嚟就係宣講會+校招喇。講道理,呢兩日真係多嘢要拎,中秋其實仲未養好,呢次真切明白到點解話腰唔得就虛。

25 號宣講會,搞完之後其實已經好攰,主要係嗰個部位比較攰,咁佢係支撐成個身體嘅,所以特別唔舒服。但冇計啦,大把嘢要做,邊有得休息。嗰晚加班到三點幾,係滴滴上面訓著,翻到屋企四點幾。

又驚吵醒屋企人,涼都冇沖就訓教。雖然老闆話翻十點,但係肯定一早有大把嘢要準備,所以訓到七點幾又起身,打個車翻工(真心奢侈,勁貴)。

但其實面試當天我係冇乜嘢要做嘅,因為都係通傳、引導嘅工作。不過慘就慘在一個勁悶,冇辦法治愈心情,一個就係冇得坐!!!嗰日條腰啊,真係好似唔係自己嘅咁。

然後可能因為心情+身體各種原因吧,嗰日可能係我第一次係公司發爛 za。

老闆一班人唔知點解突然講到我,有一句意思類似“別說他了,等下又要發脾氣了”。其實我都已經唔係好記得嗰句話係咩喇,反正唔係發脾氣就係另一個唔好嘅詞啦。

當時就覺得好莫名其妙,特別個“又”字。所以一下子就忍唔住,駁咗一句,類似“我怎麼又 XXX 啦!”

我都唔知自己邊度嚟嘅勇氣咁同老闆講嘢。後唔後悔?我驚到飚尿啊!

後來老闆又講到我前一晚唔肯送埋佢翻去。其實真係有啲願望。前一晚加班到三點幾,講真咁多體力勞動之後又捱到呢個鐘數,成個人完全唔識諗嘢。老闆係講過話車埋佢,但係我真係唔記得自己有冇覆佢。。。當然我心裡面係 OK 嘅,反正就附近。

落到樓下,停住一部的士,老闆突然就上去打的,我仲以為佢係唔想麻煩我,點知係以為我唔想車埋佢。。。真係千古奇冤。。。

嗰晚又 OT 到十二點幾,已經係一個廢人喇。唔係話年輕人加唔到班,主要係條腰咁嘅撚樣,我都唔想㗎。

其實一直都想揾機會同老闆講清楚。但係我老闆真係忙。其實佢幫我地頂住咗好多嘢。我話自己加班,其實佢加班係我好幾倍。

我哋嗰晚收三點,佢前兩晚就已經係呢個狀態。之後幾晚亦都係。上面好多唔合理嘅要求佢都幫我哋頂住,我哋要承受嘅可能真係濕濕碎。

搞完嗰面試,仲有好多手尾要跟,特別係啲數據。可能真係太耐冇點接觸過呢樣嘢,總係有各種錯漏,認真慚愧。


國慶,原本係想好好休息嘅。點知先休息得一日。

十月二日一早六點幾,阿媽就叫醒我,話老豆腰痛起唔到身,叫我送佢去醫院。落到樓,老豆直情叫我哋打 120 叫救護車。

雖然我自己冇試過咁嚴重,但都知道係咩感覺,而且係冇原因嘅,明明前一日冇做乜,第二日起身就會勁辛苦。最後都係冇辦法,要叫救護車。

我對住部手機,望住好耐,摁唔落去。

最後俾咗我家姐。

嗰一刻我真係覺得自己十分懦弱、冇用。同埋之後好多嘢,都係家姐去搞。講真,如果換轉身份,作為我家姐,我會鬧甚至俾我一巴。就一句話,“要你何用?”

所以真係好多謝佢。

其實唔單止我老豆,我自己係國慶都好唔舒服。

平時嘅話,休息下、鍛煉下其實就已經好好多,唔知點解今次特別辛苦,以及一直好唔到,一直到今日都仲有啲唔舒服。

總之成個國慶假期,就係飯又食唔落,覺又訓唔好。


亦都導致國慶翻嚟之後,成個人懵下懵下,一方面超級攰,另一方面諗唔到嘢。

同時上個星期又超級多嘢做,好多嘢來不及做或者有錯漏,所以上個星期俾老闆鬧咗唔少次。

尤其有一次,我明明有聽住佢講嘅要求,但係唔知咩原因,可能有聽錯、聽漏,反正寫完出嚟就俾人話冇認真聽。宜家咁講可能顯得好小兒科,但係當時,嗰個狀態、嗰個語氣等等,真係聽到成個人好沮喪,好挫敗。

然後真係喊埋出嚟。當然,係行出公司先喊。

其實上個禮拜真係好想請假,但又因為一位大佬已經請咗假,我再請就得翻兩個人,加上我手頭上真係大把嘢要做,所以都係冇請,留到今日。

慘就慘到,上星期星期五,臨收工都要俾人鬧鑊金。

唉!

周中老闆仲話要請多一個人。當然話就話因為事情太多,唔夠人手。我都係會覺得係因為自己做得太差。

唉!


聽日又要翻工喇,希望自己生生性性啦,唔好再出咁多差錯。