光棍

買下買下,唔知唔覺,都已經買咗千幾蚊嘢,真羞恥。

諗落全部都係硬件,而想買仲未買嘅都係硬件。

怪唔知得做光棍啦。


光棍都唔一定光棍節一個人過嘅。

帶咗兩個姐姐去睇波。

一個支持對面隊,一個鐘意睇靚仔。。。

等佢地嘅時候,見到一對情侶。

果陣已經兩點四十分,三點開波。

個男生個樣就好急,行喺前面,女仔著住裙,行喺後面。

直男,同款,同我一樣。[微笑]

噢唔好意思,我冇女朋友。


都係講翻場波。

講真,我一開始就唔覺得會有好多人嚟,因為註定摞唔到冠軍之後,可以講已經墻倒眾人推。

準備入場,聽到鼓聲,以為自己諗錯。

入場,果不其然。

死忠嘅南看台,十分稀疏。嚟睇過咁多場波,今場嘅南看台係我覺得最少人嘅。

而年票區嘅人氣亦都麻麻。

反而係散客區幾乎爆滿。咁就梗係啦,票價平,時間正,多人買正常啦。

但今場嘅氣氛係我睇過咁多場裡面,最差一場。

有乜可能,亞洲魔鬼主場,會俾客隊助威聲響徹全場?

喺客隊助威嘅時候,竟然有好幾次全場安靜,主隊球迷毫無反應。

咁呢啲嘢唔係班散票球迷可以解決㗎。肯定要鼓聲、要球迷協會、要南看台去引導、去發力。

球迷都冇心助威。畢竟奪冠無望,上場恥敗,可能真係傷咗球迷心。

而隊波確實唔爭氣。上半場踢乜鬼啊,俾人入波係應該嘅。

惡性循環。

上半場臨結束仲要被罰落一人,講真,我已經冇乜心機。


大簡,智哥,或者列比,或者某個人,喺中場休息肯定有同班隊員做心理工作。

唔係技戰術或者個人能力問題,絕對係心理問題。

下半場一上嚟,成個精神面貌都唔同曬。

打少一人,其實真係好難,天津運氣好啲嘅話,其實都仲有波入,廣州後防堪憂。

但最後 5-1 呢個比數真係搏翻嚟先有嘅。

同時球迷亦都被帶動起身。開始聲勢加強,開始同客隊有來有往,開始興奮。

我都係果句,我可以接受冇冠軍,但唔可以接受輸得唔體面,無論係球證問題,抑或球員心理問題。

呢個賽季結束,肯定流失相當一部分球迷。

但係冇所謂㗎。

有人話,七年喇,七年裡面乜嘢人都涌曬入嚟,係時候還一個耳根清淨喇。

呢場波我真係好想睇,我仲特登著埋件波衫嚟。

其實就係情懷作祟。凈係想講,我會一路撐落去!