人人在看韓國蟲 有誰關心死廢中

「淪落人」

人人在看韓國蟲 有誰關心死廢中

全文寫曬先記得要屌人,特留喺開頭。

某大號,上次屌完佢冇查證過就亂 x 噉寫,今次又嚟,而且又係打孖嚟。

第一張,話啲香港導演走曬、變曬,啲警匪片冇港味,好難得有一部片有港味。

b245c383acbf043acaeee9554a17121.jpg

舉咗好多個導演例子,包括劉偉強,話佢轉型。

但,劉偉強係「使徒行者2」,即係你吹緊嘅哩部片嘅監製啊!

好,你可以話佢係監製,唔係導演。得,俾你蒙混過關。

但第二張呢?

0d5df402a64db4e400a1ce6fd1b1159.jpg

明明個情景係去買菜俾人呃,點解會變成賣豬肉?就因為背景嘅豬肉?

你究竟有冇睇過部電影啊!!!

p2564827758.jpg

(哩張圖同原文張圖前後呼應)

開局一張圖,文章全靠編?

點解寫嘢可以咁唔負責任。


「寄生蟲」真係好紅。

我本來都幾有興趣,甚至諗過去香港睇。

但係突然出咗資源,套戲一夜之間出曬名,仲因為版權問題成為咗「奢侈品」,吸引到更多人關注。

誇張到,有啲人連磁鏈係乜都唔知道,就問人摞資源。

認真荒誕。

我都下載咗。但係,真係冇乜興趣去打開。下載嘅嗰一晚,我睇咗另一部想睇好耐嘅戲:

「淪落人」 Still Human

p2553169419.jpg

香港,公屋。

你有冇體會過好嬲好想發洩但係冇辦法發洩嘅感覺?

昌榮對哩種感覺好熟悉。

佢每日都坐喺輪椅上面,胸部以下癱瘓,手雖然可以郁,但極其唔靈活。

p2546373026.jpg

日日都好想發老脾,但凈係可以嗌出嚟,連撼頭埋墻都好難。

每晚訓覺,半夜要人幫手翻身,唔係嘅話就會生褥瘡。

變成生活不能自理嘅廢人,佢成日都問:「究竟我做錯咗啲咩?」

p2564853287.jpg

嗰日,佢係地盤工地,好平常咁行過嗰個位,點知禍從天降,啲建築材料迮落嚟……

老婆改嫁,仔跟老婆走,細妹又極其嫌棄自己……

話就話有賠償,但做人做到咁,又有咩意義?

p2554650666.jpg

佢想死。

好艱難噉爬上欄杆,越過去,就可以了解一切。

但無論佢幾落力都好,個身就係唔聽話……


你有冇諗過拋低一切,到異國他鄉獨自流浪、生活?

阿蓮會同你講千其唔好。

佢係菲律賓人,宜家喺香港,可以叫「賓妹」,亦都可以叫「菲傭」。

神奇嘅係,佢係一名大學生菲傭。

唔單止咁,佢仲摞到國外大學嘅 offer,去讀佢嘅摯愛:攝影。

p2553241793.jpg

但係,家境貧寒,根本無法支持佢嘅學業。

最慘嘅係,佢阿媽,半賣半嫁咁,講佢送咗出去。

束手無策,佢決定申請婚姻無效,另外一個人嚟到香港打工。

「這不是家。只是一處避難所。」

p2565500901.jpg

做菲傭,很看命。

有人的僱主住半山豪宅,豪爽大方,彬彬有禮……

有人的僱主一家大細有老人細路,照顧起身十分吃力……

阿蓮仲慘,要照顧殘疾人,起居飲食,大小二便,一手包辦……


「淪落人」喺今年嘅 HKIFF 有得睇,因為各種原因冇睇到。

貌似係喺舊年就已經上畫,當時有好多圈內明星造勢,感人肺腑、痛哭流涕之類。

所以我都想睇想咗好耐,終於俾我等到。

新人導演陳小娟,監製陳果,主演黃秋生,摘得金像獎影帝,唔期待肯定係呃你嘅。

又一部香港電影扶持計劃嘅作品,認真佩服。

導演本身經歷亦頗為傳奇,「半路出家」,學拍電影,拍出一套獲得金像獎獎項嘅電影,不得不寫個服字。


講到電影本身。

感受比較深嘅首先係市井氣息。

地盤工人,唔通同你文縐縐咩?所以會聽到好多地道嘅粵語表達,包括粗口:

When you want to say thank you to someone in Cantonese, you may say " 多撚謝 "。

p2564827942.jpg

週末去過香港嘅人可能會知道,一到禮拜日,啲菲傭好鐘意聚埋一堆,自成一道風景。

街市阿姐恃住聲大夾惡,語言不通,成日恰啲菲傭,呃稱、找少數。

街鋪租金月月加,老字號做唔落去,一間一間執笠,做埋今個月唔做喇。

p2564849482.jpg

所有哩啲,令人感到好親切而平實。

而就喺平實裡面,有唔少好自然嘅淚點。咩叫自然?就係冇特登嘅感覺。

p2565470040.jpg

宜家有好多片,一到咗啲情緒位,搏命去谷你啲情緒。係就係有用,可能都會喊,但始終覺得唔舒服。


具體嘅感動情節我就唔打算多講。

套戲除咗想講哩個感人故事,其實係表達緊兩個群體嘅目前處境。

因意外致殘、癱瘓,生活不能自理,妻離子散……

p2564769423.jpg

出於人道,當然要鼓勵生命延續。但係,現實啲去諗,又有咩意義呢?

平時講廢中,我哋係指嗰啲到咗中年之後,毫無追求,渾渾噩噩過日,又阻住年青一代發達嘅人。

但係,好似昌榮噉嘅,廢過廢中吧。

亦都慘過廢中。

佢哋個夢想、追求係被動放棄嘅,活成宜家噉,佢哋根本冇得揀。

p2565500932.jpg
p2564827757.jpg

至於菲傭哩個群體,我都係第一次從戲裡面知道咁多嘢。

而我喺度最想講嘅係歧視。

我冇諗到,喺咁樣一個國際化都會裡面,竟然有如此嚴重嘅人種歧視。

裡面個角色形容僱主與菲傭嘅感情關係為「骯髒」。

對於我咁樣一個唔了解亦唔喺嗰個社會環境下成長嘅人嚟講,好難理解。

更重要嘅係,說話人也未見得社會地位有幾咁高。

據另一角色所說,也不過係嫁給 Tony 老師作妻子。

p2564997495.jpg

唔考慮其他情況,最多係老闆?除非話做到幾十間連鎖店嘅老闆,唔係嘅話,有咩咁把炮啊?

就連唔把炮嘅人,都可以咁歧視人哋,咁係更高嘅階層,情況就愈加嚴重。

然後,就到咗「寄生蟲」。

循環往復。

最令人絕望嘅係,我哋唔知道可以做啲咩。

故事再感人,抵不住現實嘅殘酷。